സ്നേഹക്ഷതങ്ങൾ

കത്തും വിളക്കിന്റെ പുഞ്ചിരി നോക്കി 

കിട്ടാക്കനി കിട്ടിയെന്നോർത്ത്

അതിനു നേർക്ക് പറന്നു ചെന്ന

ശലഭം പോലെ കരിഞ്ഞു പോയി ഞാൻ ... 

കണ്ണു നീരുണങ്ങിയ കവിളിൽ തട്ടി 

ചുടു മുത്തം നൽകിയപ്പോൾ 

അതെന്റെ സ്വപ്നങ്ങളുടെ 

മൃതശരീരത്തിൽ നീ നൽകിയ 

അന്ത്യ ചുംബനമെന്ന് ഞാൻ ഓർത്തില്ല...

ഒടുവിൽ കണ്ട പാതി മങ്ങിയ 

നിന്റെ മുഖമൊരു കൃഷ്‌ണശിലയിൽ

കോറിവരച്ച രേഖാചിത്രം പോലെ 

അരണ്ടും തെളിഞ്ഞും കത്തിനിൽപ്പുണ്ട്... 

കടൽ പോലും തേങ്ങിയിരമ്പുന്നത് 

ഞാൻ അറിയുന്നുണ്ട്

കണ്ണിൽ ഇരുട്ട് മൂടുന്ന പകലുകൾ 

നിനക്ക് അപരിചിതമായിരിക്കും 

സ്വപ്നങ്ങൾ ഉഴുതു മറിച്ചു നാമന്ന് 

ഒരുമിച്ചൊരു ചെമ്പകം നട്ടിരുന്നു 

മോഹങ്ങൾ പോലെ പൂത്ത മൊട്ടുകൾ

പാതി വിരിഞ്ഞപ്പോഴേ കൊഴിയണമല്ലേ? 

തനിയാവർത്തനം ചെയ്ത 

മറ്റൊരു  ദുരന്തത്തിന് കൂടി 

കലാശം കുറിച്ചു ഞാനെന്റെ 

തൂലിക താഴെ വയ്ക്കുന്നു... 

വെറുതെയെങ്കിലും ഒരു മോഹം

എന്റെ ചിന്തകൾ മഞ്ഞുപോലെ 

ഉരുകിയൊലിക്കണമെന്ന് 

നമ്മുടെ പൂക്കാലം കാണണമെന്ന്...

#ദിപിൻ_ജയദീപ്.